Björgólfur ætlar ekki að yfirgefa West Ham

Greinarhöfundur í breska dagblaðinu The Times fullyrðir að Björgólfur Guðmundsson muni ekki yfirgefa West Ham jafnvel þótt að félagið þurfi að borga meira en fimm milljarða króna vegna Tevez-málsins svokallaða.

Smelltu hér til að lesa greinina. Þar er fullyrt að ekki sé langt síðan að Björgólfur setti fimm milljarða inn í félagið og að hann muni gera það aftur, sé þörf á því.

Farið er yfir sögu Björgólfs frá því að hann kom til sögunnar hjá West Ham. Til að mynda þátt Eggerts Magnússonar sem margir segja að sé ábyrgur fyrir þeirri launastefnu sem myndaðist hjá félaginu sumarið 2007 þegar menn eins og Freddie Ljungberg voru fengnir til félagsins.

Carlos Tevez og Javier Mascherano komu til félagsins haustið 2006, nokkrum mánuðum áður en Björgólfur og Eggert keyptu félagið. West Ham var síðar á tímabilinu sektað um 5,5 milljónir punda fyrir að hafa brotið reglur ensku úrvalsdeildarinnar við skráningu leikmanninna.

Samningsréttur beggja var í eigu Kia Joorabchian en vegna málsins er nú ólöglegt að félög í deildinni tefli fram leikmönnum sem eru í eigu þriðja aðila.

West Ham íhugaði að lögsækja Terence Brown, fyrrverandi stjórnarformann og eiganda félagsins, vegna þessa. Brown var sagt upp störfum og lögsótti hann West Ham vegna þessa. Það mál fór aldrei fyrir rétt þar sem aðilar komust að sátt í málinu áður en kom til þess.

En það þýðir að West Ham getur ekki lögsótt Brown vegna nýrra sekta sem West Ham stendur nú frammi fyrir.

Í gær var sagt frá því að Sheffield United hafi unnið mál sitt fyrir gerðardómi gegn West Ham. United féll vorið 2007 á meðan að West Ham náði að bjarga sér frá falli. Carlos Tevez þótti gegna lykilhlutverki þegar að félaginu tókst að forðast fallið.

Það var Sheffield United ekki sátt við og hóf því málsókn sína fyrir sextán mánuðum síðan. Það fer fram á 5,2 milljarða í skaðabætur en annar gerðardómur verður skipaður til að ákveða viðurlög West Ham.