Lárus og Þórður hafa unnið tvisvar

Íslendingar eiga fulltrúa í bikarúrslitaleiknum í Englandi á morgun og af því tilefni skoðar Fréttablaðið eftirminnilegustu bikarúrslitaleiki íslenskra knattspyrnumanna á erlendri grundu.

Hermann Hreiðarsson verður á laugardaginn fyrsti íslenski knattspyrnumaðurinn til þess að spila bikarúrslitaleik á Wembley þegar lið hans Ports­mouth mætir Cardiff í FA-bikarnum, elstu keppni í heimi.

Hermann er þó ekki fyrsti Íslendingurinn til þess að spila úrslitaleik í ensku bikarkeppninni því Eiður Smári Guðjohnsen var í tapliði Chelsea á móti Arsenal 2002 en leikurinn fór þá fram í Cardiff þar sem verið var að endur­byggja Wembley.

Hermann getur þar með komist í hóp þeirra íslenskra knattspyrnumanna sem hafa unnið bikarmeistaratitil erlendis.

Albert Guðmundsson varð fyrsti íslenski knattspyrnumaðurinn til þess að leika í bikarúrslitaleik á erlendri grundu þegar hann spilaði til úrslita með liði sínu Racing Club de Paris 14. maí 1950. Albert og félagar urðu að sætta sig við 0-2 tap á móti nágrönnum sínum í Stade de Reims.

Meistari í tveimur löndum

Lárus Guðmundsson skipar sér í nokkra sérstöðu yfir árangur í bikarkeppnum erlendis og það af fleiri en einni ástæðu.

Lárus er sá eini sem hefur unnið bikarinn í tveimur löndum og sá eini sem hefur byrjað inn á í bikar­úrslitaleik og unnið bikarinn í einu af stóru löndunum (Englandi, Ítalíu, Spáni, Frakklandi og Þýskalandi). Lárus er líka aðeins einn af fjórum leikmönnum sem hafa náð að skora tvö mörk í bikarúrslitaleik.

Lárus Guðmundsson varð fyrst bikarmeistari með Waterschei í Belgíu 1982 þegar hann skoraði bæði mörkin í 2-0 sigri á Waregem og aðeins þremur árum seinna vann Lárus bikarinn í Vestur-Þýskalandi með liði sínu Bayer Uerdingen sem vann Bayern München 2-1 í úrslitaleik. Lárus lék vel í leiknum og átti þátt í sigur­markinu en Uerdingen lenti 0-1 undir.

Mörk í tveimur úrslitaleikjum

Þórður Guðjónsson er ásamt Lárusi sá eini sem hefur tvisvar sinnum orðið bikarmeistari erlendis en hann vann belgíska bikarinn tvisvar með Racing Genk, árin 1998 og 2000.

Þórður skoraði í báðum bikar­úrslitaleikjunum, þar af tvö mörk í seinni leiknum árið 2000. Þórður var valinn besti maður bikar­úrslitaleiksins árið 2000 þegar Genk vann 4-1 sigur á Standard Liege. Staðan var 1-1 í hálfleik en Þórður tók yfir leikinn í seinni hálfleik og skoraði þá tvö mörk og lagði upp það þriðja. Þórður hafði einnig skorað eitt mark og lagt upp annað í úrslitaleiknum tveimur árum áður og er því sá eini sem hefur skorað í tveimur úrslitaleikjum.

Afrek Péturs Péturssonar frá árinu 1980 er líka með þeim eftirminnilegri en Pétur skoraði þá tvö mörk fyrir Feyenoord í 3-1 sigri á hollensku meisturunum Ajax í bikarúrslitaleiknum sem fram fór á heimavelli Feyenoord.

Ajax byrjaði betur, komst í 1-0 og klikkaði síðan á vítaspyrnu. Pétri brást hins vegar ekki bogalistin þegar hann jafnaði leikinn úr vítaspyrnu á 39. mínútu og hann innsiglaði síðan sigurinn með því að skora þriðja markið fimmtán mínútum fyrir leikslok.

Helgi Sigurðsson er fjórði íslenski knattspyrnumaðurinn sem hefur skorað tvennu í bikarúrslitaleik en hann skoraði tvö mörk í 3-1 sigri Stabæk á norsku meisturunum í Rosenborg í framlengdum bikarúrslitaleik árið 1998. Helgi skoraði fyrsta mark leiksins strax á 5. mínútu og innsiglaði síðan sigurinn í framlengingunni.

Meðal annarra íslenskra knattspyrnumanna sem hafa orðið bikar­meistarar á erlendri grundu eftir að hafa spilað í sjálfum bikar­úrslitaleiknum má nefna:

Jóhannes Eðvaldsson (Celtic, Skotlandi 1977), Ásgeir Sigurvinsson (Standard Liege, Belgíu 1981), Arnór Guðjohnsen (Anderlecht, Belgíu 1988), Árna Gaut Arason (Rosenborg, Noregi 1999), Ólaf Örn Bjarnason (Brann, Noregi 2004) og Kára Árnason (Djurgården, Svíþjóð 2005) auk þess sem Guðni Bergsson varð bikarmeistari með Tottenham árið 1991 en fékk þá ekki að spreyta sig í bikarúrslitaleiknum.

Stefán Gíslason varð síðasti Íslendingurinn til þess bæði að spila bikarúrslitaleik og að vinna bikarmeistaratitil erlendis þegar hann leiddi Bröndby til sigurs í dönsku bikarkeppnini 1. maí síðastliðinn. Stefán náði því ennfremur að vera fyrsti Íslendingurinn sem tekur á móti bikarnum sem fyrirliði hjá erlendu liði.