Tveir handteknir vegna Mido-málsins

Tveir af stuðningsmönnum Newcastle hafa verið handteknir vegna gruns um að hafa beint kynþáttaníð að framherjanum Mido i grannaslag Newcastle og Middlesbrough á dögunum.

Sagt er að lítill hópur áhorfenda hafi hrópað "Mido er með sprengju" að leikmanninum og tók hann því sem fordómum.

Talsmenn Newcastle hafa reynt að draga úr atvikinu og segja stuðningsmennina hafa verið að vísa í þá staðreynd að Mido sé nokkuð líkur Richard Reid - sem er betur þekktur sem "Skósprengjumaðurinn"

Mido brást mjög illa við atvikinu og gekk svo langt að segja að knattspyrnusambandið væri skipað kynþáttahöturum, því þeir gerðu aldrei neitt í því þegar mál eins og þetta kæmu upp á borðið.

Knattspyrnusambandið hefur sent frá sér yfirlýsingu þar sem fram kemur að kynþáttafordómar verði ekki liðnir í leikjum á Englandi.