Englendingar lögðu Bandaríkjamenn

Englendingar lögðu Bandaríkjamenn 2-0 í vináttuleik þjóðanna á Wembley í kvöld. John Terry og Steven Gerrard skoruðu mörk enska liðsins sem vann verðskuldaðan sigur.

Terry kom enska liðinu yfir með skalla í fyrri hálfleik og tileinkaði stuðningsmönnum Chelsea mark sitt eftir ófarirnar í Mosvku í úrslitaleik Meistaradeildarinnar á dögunum.

David Beckham lagði upp markið með laglegri fyrirgjöf, en hann lék þarna sinn 101. landsleik fyrir Englendinga.

Í síðari hálfleiknum kom svo Gareth Barry inn sem varamaður fyrir Frank Lampard og var ekki lengi að leggja upp mark fyrir Steven Gerrard sem innsiglaði sigur enska liðsins.

Þetta var þriðji leikur enskra undir stjórn Fabio Capello.

Leikurinn verður sýndur á Stöð 2 Sport í kvöld um klukkan klukkan 21:20.