Benitez er sáttur

Rafa Benitez, stjóri Liverpool, segist vel geta unað við 1-1 jafnteflið gegn Arsenal á Emirates í Meistaradeildinni í kvöld. Hans mönnum nægir nú 0-0 jafntefli á heimavelli til að komast í undanúrslitin.

"Það var gríðarleg vinnsla á liðinu í fyrri hálfleik og því varð ég að gera nokkrar breytingar á því í þeim síðari. Það er alltaf gott að skora á útivelli í Evrópukeppninni, en við vitum að Arsenal er lið sem getur vel skorað á útivelli líka. Við erum í það minnsta með öll spilin á hendinni núna," sagði Benitez í samtali við Sky.

Hann var spurður að því hvort hann ætlaði að notast við svipað leikskipulag í síðari leiknum. "Við verðum að sjá til. Það fer mikið eftir líkamlegu ásigkomulagi leikmanna - hvort þeir geta haldið boltanum meira innan liðsins en þeir gerðu í kvöld," sagði Spánverjinn.