Tekur yfirlýsingum City með fyrirvara

David Gill, framkvæmdastjóri Manchester United, segist taka tíðindum af fyrirhuguðu risatilboði Manchester City í Cristiano Ronaldo með hæfilegum fyrirvara.

Sulaiman Al-Fahim, eigandi City, lýsti því yfir í viðtölum á dögunum að hann hefði hug á að kaupa marga af bestu knattspyrnumönnum heims til félagsins. Þar á meðal talaði hann um að kaupa Ronaldo fyrir yfir 100 milljónir punda - sem gerði Portúgalann um leið að langdýrasta knattspyrnumanni sögunnar.

"Þetta var áhugaverð yfirlýsing sem hljómaði eins og hún kæmi frá knattspyrnuaðdáanda. Það olli nokkru fjaðrafoki þegar Alex Ferguson talaði um að kaupa Dimitar Berbatov áður en kaupin komu til, en þessi maður minntist líka á Fernando Torres og Cesc Fabregas, svo ætli við tökum orðum hans ekki með hæfilegum fyrirvara," sagði Gill.

"Tilboð á borð við það sem hann var að tala um er augljóslega svo hátt að það myndi setja leikmannamarkaðinn á hliðina, svo ég á ekki von á því að honum sé alvara með allt þetta."