Trúaði trúbadorinn hýsti bæði morðingja og flóttamann

Pólverjarnir Slawomir Sikora og Premyslaw Plank voru þar til nýlega báðir leigjendur hjá Guðlaugi Laufdal athafnamanni.

Slawomir Sikora myrti tvo mafíósa í Póllandi og Plank er sjálfur meintur mafíósi og var handtekinn í gær grunaður um aðild að óupplýstu morði í Póllandi.

Guðlaugur er líklega þekktastur fyrir þætti sem hann var með á sjónvarpsstöðinni Ómega fyrir nokkru en þá fékk hann viðurnefnið trúaði trúbadorinn.

Guðlaugur leigir pólskum verkamönnum íbúðarhúsnæði og hefur í nokkur skipti haft milligöngu um að koma þeim fyrir í vinnu. Hann mun meðal annars hafa haft milligöngu um að finna vinnu handa Premyslaw Plank þegar hann kom til Hafnarfjarðar frá Kárahnjúkum.

Slawomir Sikora bjó hjá Guðlaugi á Sævangi en Plank bjó í íbúð á hans vegum á holtinu í Hafnarfirði.

Slawomir Sikora steig svo fram í gær og sagði frá því að hann væri á flótta undan Premyslaw Plank, sem Fréttablaðið greindi frá á laugardag að væri grunaður um óupplýst morð í Póllandi.

Málið vakti mikla athygli og var Plank svo handtekinn seinnipartinn í dag. Hann mun svo að öllum líkindum verða úrskurðaður í gæsluvarðhald síðar í dag þar til hann verður framseldur til Póllands.

Slawomir Sikora andar líklega léttar við þessi tíðindi en hann er alls ekki ókunnugur því að verða fyrir barðinu á hótunum frá ótýndum glæpamönnum.

Árið 1994 myrti Sikora nefnilega tvo glæpamenn úr pólsku mafíunni sem reynt höfðu að kúga af honum fé.

Málið vakti mikla athygli í Póllandi og gerð var kvikmynd sem byggð var á sögu Slawomir Sikora. Myndin hlaut nafnið Dlug eða Skuld.

Kvikmyndin vann til fjölda verðlauna og forseti Póllands náðaði Sikora í kjölfarið.

Hægt er að lesa sér til um kvikmyndina Skuld hér