Ronaldo vill fara til Real Madrid

Cristiano Ronaldo segist dreyma um að fara til Real Madrid þó svo að félag hans, Manchester United, hafi engan áhuga á að selja hann.

Ronaldo hefur haldið knattspyrnuheiminum í limbói undanfarnar vikur en hefur nú greint frá hvað hann sjálfur vill gera.

„Allir vita hvað ég vill gera en þetta er ekki bara undir mér komið," sagði Ronaldo og bætti við að hann hefði þegar verið búinn að ákveða sig fyrir úrslitaleikinn í Meistaradeild Evrópu.

Hann greindi einnig frá því að landsliðsþjálfari Portúgal, Luiz Felipe Scolari, hefði ráðlagt sér að fara til Real Madrid.

„Þetta er sannkallaður draumur og skref fram á við fyrir mig," sagði Ronaldo. „Þetta er frábært tækifæri sem manni býðst ekki oft á ævinni. Eins og Scolari sagði ætti maður að grípa það þegar það gefst."

Hann hefur ekkert rætt við Sir Alex Ferguson, stjóra United, á meðan Portúgal keppti á EM en áætlað er að þeir muni hittast á fimmtudaginn næstkomandi.

„Þetta er mín skoðun og mitt álit," sagði Ronaldo spurður um hvort hann hefði áhyggjur af því að hann hefði reitt forráðamenn United til reiði.

„Þess vegna er mér alveg sama þótt fólk verði æst. Þetta er mín ákvörðun. Þetta er það sem ég vil."