Eggert tryggði Hearts sigur

Eggert Gunnþór Jónsson var hetja skoska úrvalsdeildarliðsins Hearts í dag er hann tryggði sínum mönnum 1-0 sigur á St. Mirren á útivelli í dag.

Eggert hefur undanfarið spilað í stöðu hægri bakvarðar hjá Hearts en lék sem miðvörður í dag. Hann skoraði sigurmark leiksins á 79. mínútu með skalla eftir fyrirgjöf Robbie Neilson úr aukaspyrnu.

Sigurinn var einkar sætur þar sem Michael Stewart, leikmanni Hearts, var vikið af velli á 42. mínútu.

Þá vann Celtic 2-0 sigur á Motherwell með mörkum Paul Hartley og Scott McDonald.

Celtic er á toppi deildarinnar með 31 stig en Hearts færðist upp í fjórða sætið með sigrinum í dag og er nú með sautján stig.

Önnur úrslit í dag:

Dundee United - Aberdeen 2-1

Hamilton - Falkirk 1-1

Hibernian - Inverness 1-2