United í úrslit eftir markaveislu í Japan

Evrópumeistarar Manchester United eru komnir í úrslitaleik HM félagsliða en keppnin stendur yfir í Japan. United vann Asíumeistara Gamba Osaka í undanúrslitum í dag 5-3.

United hafði tveggja marka forystu í hálfleik með skallamörkum Nemanja Vidic og Cristiano Ronaldo eftir hornspyrnur Ryan Giggs.

Þegar rúmur stundarfjórðungur var eftir af leiknum opnuðust allar flóðgáttir og mörkin streymdu inn. Gamba Osaka minnkaði muninn áður en United skoraði þrjú mörk á fjórum mínútum. Varamennirnir Wayne Rooney og Darren Fletcher sáu um það en sá fyrrnefndi skoraði tvö mörk.

Gamba Osaka skoraði tvö síðustu mörk leiksins en þau dugðu skammt og ljóst að United mætir LDU Quito frá Ekvador í úrslitaleiknum á sunnudaginn. Sá leikur verður sýndur beint á Stöð 2 Sport.

Leikurinn í dag var í beinni lýsingu hér á Vísi.

Man Utd - Gamba Osaka 5-3

1-0 Vidic (28.), 2-0 Ronaldo (45.), 2-1 Yamazaki (74.), 3-1 Rooney (75.), 4-1 Fletcher (78.), 5-1 Rooney (79.), 5-2 Endo (víti 85.), 5-3 Hashimoto (90.)

______________________

12:25 Leik lokið. Gamba Osaka minnkaði muninn í 5-3 í uppbótartíma og urðu það lokatölur leiksins.

12:14 MARK! Hendi á Gary Neville innan teigs og vítaspyrna dæmd. Gamba Osaka náði að minnka muninn úr spyrnunni.

12:10 MÖRK! Flóðgáttirnar hafa heldur betur opnast og varamenn United láta til sín taka. Darren Fletcher skoraði fjórða mark United og Rooney það fimmta (og annað mark sitt) Þrjú mörk frá United á fjórum mínútum.

12:07 MÖRK! Masato Yamazaki náði að minnka muninn fyrir Gamba Osaka með laglegu marki. En Wayne Rooney svaraði strax og skoraði með sinni fyrstu snertingu. Ótrúlegur leikkafli. 3-1 fyrir United.

12:04 United hefur leikinn í sínum höndum og bara formsatriði að klára hann. Tevez er farinn af velli fyrir Wayne Rooney.

11:58 Sir Alex Ferguson hefur framkvæmt fyrstu skiptingar leiksins. Darren Fletcher er kominn inn fyrir Paul Scholes sem var að stíga upp úr meiðslum. Þá kom Johnny Evans inn fyrir Nemanja Vidic.

11:46 Hurð skall nærri hælum upp við mark United. Gamba Osaka í stórhættulegri sókn en gestirnir náðu að bægja hættunni frá.

11:31 Seinni hálfleikur að hefjast. United er í ansi þægilegri stöðu og mikið þarf að fara úrskeiðis til að liðið missi þetta úr sínum höndum.

11:17 MARK! Gamba Osaka gengur illa að ráða við hornspyrnur Ryan Giggs. Nú er það Cristiano Ronaldo sem skoraði með glæsilegum skalla eftir horn í uppbótartíma fyrri hálfleiks. Það er kominn hálfleikur.

10:58 MARK! Nemanja Vidic kemur Manchester United yfir með skalla eftir hornspyrnu frá Giggs. United hefur verið að taka völdin á vellinum.

10:48 Leikmenn Gamba Osaka hafa sýnt það á upphafskafla leiksins að þeir kunna ýmislegt. Þeir hafa látið reyna á Van der Sar í marki Manchester United. Stefnir alls ekki í auðveldan leik fyrir Evrópumeistarana.

10:36 Leikurinn er hafinn í Japan en það eru 80 þúsund áhorfendur á pöllunum og stemningin góð.

10:15 Wayne Rooney byrjar á varamannabekk United en Dimitar Berbatov er fjarri góðu gamni. Hér að neðan má sjá byrjunarlið United.

Byrjunarlið: Van der Sar, Neville, Ferdinand, Vidic, Evra, Nani, Anderson, Scholes, Giggs, Ronaldo, Tevez.

Varamenn: Kuszczak, Rafael Da Silva, O'Shea, Evans, Carrick, Fletcher, Gibson, Park, Welbeck, Rooney, Amos.