Rangers skoraði sjö

Rangers vann í dag 7-1 stórsigur á Hamilton í skosku úrvalsdeildinni í dag en fjölda leikja var frestað víða um landið.

Þótt ótrúlega megi virðast komst Hamilton yfir í leiknum með marki James McArthur á annarri mínútu.

Kenny Miller jafnaði svo metin á elleftu mínútu og Kris Boyd skoraði næstu þrjú mörk Rangers. Kyle Lafferty, Nacho Novo og Steve Davis bættu svo við síðustu þremur mörkunum á síðustu tíu mínútum leiksins.

St. Mirren vann svo Falkirk, 2-1, og Dundee United bar sigurorð af Inverness en hinum tveimur leikjum dagsins í deildinni var frestað.

Það voru viðureignir Kilmarnock og Aberdeen annars vegar og Motherwell og Hearts hins vegar. Þá var fjölda leikja frestað í neðri deildum.

Víða um Skotland voru vellirnir frosnir og þaktir snjó en samkvæmt reglum skoska knattspyrnusambandsins ber félögunum að vera með hitalagnir undir völlum sínum. Ljóst þykir að þó nokkur félög hafi ekki farið eftir þeim reglum, til að mynda Kilmarnock og Motherwell.