Ófært um Víkurskarð en verið er að moka

Vegagerðin segir að enn sé ófært um Víkurskarð en unnið er að mokstri þessa stundina. Þá eru hálkublettir frá Borganesi og víða á Snæfellsnesi.

Hálkublettir eru á Holtavörðuheiði og Bröttubrekku og á Vestfjörðum er hálka á Steingrímsfjarðarheiði og á flestum leiðum, þó eru hálkublettir á sunnanverðum Vestfjörðum.

Á Norðvestur- og Norðausturlandi er hálka og hálkublettir á öllum helstu leiðum og snjóþekja á milli Ólafsfjarðar og Akureyrar. Þæfingsfærð er út Blönduhlíð og í Dalsmynni. Þæfingsfærð er einnig á Mývatnsöræfum og stendur mokstur þar yfir.

Á Austurlandi er hálka og skafrenningur er á Fjarðarheiði, á Fagradal er snjóþekja og þar stendur mokstur yfir. Snjóþekja og skafrenningur á Oddskarði. Hálkublettir eru meðfram ströndinni frá Fáskrúðsfirði að Hvalnesi. Þæfingsfærði og skafrenningur er á Öxi og Breiðdalsheiði.

Á Suður- og Suðausturlandi eru vegir nánast auðir, þó eru hálkublettir á Hellisheiði og í Þrengslum. Hálka á Nesjavallaleið.