Guðjón horfir til Englands

Guðjón Þórðarson segist hafa fullan hug á að taka við liði á Englandi á ný. Hann er nú að ljúka við að ná sér í þjálfunarréttindi Uefa.

"Ég hef verið í burtu frá Englandi í nokkurn tíma núna en ég hef áhuga á að starfa þar á ný," er haft eftir Guðjóni á Sky Sports í dag. Hann var síðast þjálfari Skagamanna síðastliðið sumar.

"Ég er að klára að taka þjálfunarréttindi mín ásamt mönnum eins og Gareth Southgate og þetta er mjög gott námskeið," sagði Guðjón og segist ætla að sækja um stjórastöðu á Englandi í framtíðinni.

"Ég á góðar minningar frá Englandi frá því þegar ég var með Stoke, Barnsley og Notts County og mig langar að snúa aftur til Englands. Ég veit um nokkur laus störf og ég ætla mér að sækja um þau. Ég er viss um að ég get náð árangri líkt og ég náði hjá Stoke," sagði Guðjón.