Borgarstjóri segir R-listann hafa ákveðið byggingu öldrunaríbúða í Mörkinni

Vilhjálmur Þ. Vilhjálmsson, borgarstjóri segir að allar ákvarðanir um byggingu íbúða fyrir aldraða í Mörkinni hafi verið teknar af R-listanum. Hann segir að sér hafi fundist illa staðið að ákvörðunum um byggingu íbúðanna.

Vilhjálmur segist hafa gagnrýnt fyrirkomulagið harkalega á sínum tíma. Þegar byrjað hafi verið að byggja þessar íbúðir hafi legið ljóst fyrir að þær yrðu mjög dýrar. Fermetrarverðið hafi verið á 306 þúsund krónur við síðustu borgarstjórnarkosningar. R-listinn hafi kallað þetta þjónustuíbúðir en neitað að samþykkja byggingu þjónustukjarna sem fjármagnaður yrði af Reykjavíkurborg.

Vilhjálmur segir að samkomulagið sem samþykkt hafi verið í borgarráði í gær geri ráð fyrir að íbúðirnar verði seldar til íbúa á aldrinum 60 ára og eldri. Það sé rangt að þær verði seldar hverjum sem er. Hann segir að Nýsir áformi að bjóða upp á mjög mikla þjónustu fyrir íbúana sem þarna muni búa. Þar verði öryggisþjónusta, matarþjónusta, hárgreiðsluþjónusta, heilsulind og púttvöllur. Nýsir muni svara allri þeirri þjónustu sem óskað verði eftir.

Í fréttatilkynningu frá Nýsi er tekið undir þessi orð Vilhjálms. Þar segir að engin áform séu um að hverfa frá fyrirhugaðri byggingu þjónustuíbúða fyrir aldraða.Viðræður hafi farið fram við borgaryfirvöld um að tryggja íbúum félagslega þjónustu.  Jafnframt hafi farið fram viðræður við Heilsugæslu höfuðborgarsvæðisins um að tryggja íbúum heimahjúkrun.

Þá segir í fréttatilkynninguni að það sé rangt sem fullyrt hafi verið að fermetraverð íbúðanna sé allt að 500 þúsund krónur.  Hið rétta sé að meðal fermetraverð án bílageymslu sé 404 þúsund krónur og með bílageymslu 429 þúsund krónur.  Ódýrasta fermetraverðið án bílageymslu sé   350.814 krónur og 377 þúsund krónur með bílageymslu.

Vilhjálmur segir að verið sé að byggja 100 þjónustu- og öryggisíbúðir við Sléttuveginn og rúmlega 100 við Spöngina sem verði líklegast tilbúnar um áramót 2008-2009. Þar verði heimilaður búseturéttur eða íbúðirnar leigðar út á kostnaðarverði. Gengið verði frá því í samningum við Eir og Hrafnistu að þarna verði byggður þjónustukjarni í tengslum við íbúðirnar.

Vilhjálmur segir að í stjórnartíð R-listans hafi ekki ein einasta þjónustuíbúð verið byggð. Því furði hann sig á skyndilegum áhuga Dags B. Eggertssonar á málaflokknum.