Má aðeins vísa grunnskólanemum úr skóla fyrir fíkniefnasölu

Óheimilt verður að vísa nemanda úr skóla fyrir alvarleg agabrot nema annað skólaúrræði sé tryggt fyrir hann samkvæmt nýjum verkferlum sem menntaráð Reykjavíkur samþykkti í dag. Gera má undantekningu ef nemandi hefur orðið uppvís að fíkniefnasölu en þá má vísa nemanda úr skóla á meðan lögregla og Barnavernd rannsaka málið.

Fram kemur í tilkynningu frá menntasviði að með samræmdum aðgerðum sé stefnt að því að skýra hlutverk skólastjórnenda, ráðgjafa í þjónustumiðstöðvum borgarinnar og úrskurðaraðila þannig að hvergi fari á milli mála að rétt hafi verið tekið á málum. Er hér um að ræða vegvísa fyrir skólastjórnendur um hvernig taka á eigi á öllum agabrotum, allt frá brotum á skólareglum til alvarlegra lögbrota, brottvísunar úr skóla og samskipta við lögreglu og Barnavernd.

Öll brot og aðgerðir verða framvegis bókuð í skólaumsjónarkerfið Mentor og skjalfest með bréfi. Þá er skýrt skilið á milli ráðgjafar og úrskurðar og þannig komið í veg fyrir vanhæfni aðila sem að málinu kunna að koma.