Aflaverðmæti eykst um sex milljarða

Aflaverðmæti íslenskra skipa jókst um sex milljarða króna á fyrstu fimm mánuðum þessa árs miðað við sama tímabil í fyrra. Þetta kemur fram í samantekt Hagstofunnar á verðmæti sjávarafla frá ársbyrjun til loka maímánaðar. Verðmæti þorskafla jókst um 23 prósent frá fyrra ári.

Alls nam aflaverðmæti 40 milljörðum króna á fyrstu fimm mánuðum ársins en var 36 milljarðar í fyrra. Í maímánuði nam aflaverðmætið 7,4 milljörðum.

Aflaverðmæti botnfisks jókst um rúma þrjá milljarða og fór úr 26,1 milljarði í fyrra í 29,7 milljarða króna í ár. Verðmæti þorskafla nam 16,5 milljörðum og verðmæti ýsu 5,8 milljörðum króna.

Aflaverðmæti uppsjávarafla jókst um 62,8 prósent en á sama tíma dróst verðmæti flatfiska saman um 18,8 prósent. Verðmæti afla sem fluttur var út óunninn nam 3,6 milljörðum og jókst um 4,8 prósent frá fyrra ári.