Erfitt að finna einn ábyrgan

Árni M. Mathiesen fjármálaráðherra segir að erfitt geti reynst að finna einhvern einn sem bera eigi ábyrgð á Grímseyjarferjumálinu, en greinilega hafi margt farið úrskeiðis. Hann telur að heimild hafi verið í lögum fyrir öllum fjárveitingum til ferjunnar.

Saga kaupa og endurnýjunar á nýrri ferju til siglinga milli Grímseyjar og lands er ein sorgarsaga. Þegar auglýst var eftir notaðri ferju reyndist áhugi ferjueigenda lítill en á endanum var ákveðið að kaupa notaða ferju frá Írlandi sem átti að kosta 150 milljónir króna eftir breytingar. Ferjan hefur hins vegar reynst hátt í um 200 prósentum dýrari eftir miklar breytingar á þremur árum.

Í yfirlýsingu frá samgönguráðuneytinu í gær segir að ljóst sé að orðið hafi ákveðið brot á skýrum verklagsreglum ráðuneytisins sem kveði á um að gera skuli vandaða verkefnaáætlun sem innihaldi m.a. verklýsingu og tíma- og kostnaðaráætlun. Jafnframt beri verkefnisstjóra að upplýsa ráðuneytisstjóra um gang mála og fá samþykki fyrir verkefnaáætlun.

Fjármálaráðherra segir ljóst að margt hafi farið úrskeiðis í málinu sem þurfi að skoða og tryggja að komi ekki fyrir aftur. Það hafi bæði verið fjárheimildir til að kaupa skipið og til að ráðast í endurbyggingu þess, annars vegar í fjárlögum og hins vegar í heimild samgönguyfirvalda til að nýta ónýtta fjármuni frá öðrum verkefnum, þar sem heimild hafi verið fyrir verkefninu sjálfu.

Þá segir ráðherra að skoða verði sérstaklega hvort breyta beri eftirliti með framkvæmd eins og þessari þannig að fjármunir hins opinbera nýtist sem best.

Fjármálaráðherra segir það ekki gott mál ef ekki hafi verið farið eftir reglum í samgönguráðuneytinu, en þá sé ekki við reglurnar að sakast. En ef hins vegar séu gallar á reglunum sé sjálfsagt að breyta þeim. Mest um vert sé að læra af reynslunni.