Vilja að stjórnvöld kanni óeðlilegar verðhækkanir á matvælum

Neytendasamtökin vilja að stjórnvöld kanni hvað valdi óeðlilegum verðhækkunum hjá matvöruverslunum. Í yfirlýsingu frá samtökunum segir að niðurstaða könnunar verðlagseftirlits Alþýðusambands Íslands valdi miklum vonbrigðum.

Fram kemur í yfirlýsingu Neytendasamtakanna að könnun Alþýðusambandsins sýni að lækkanir vegna vörugjalds hafi ekki skilað sér til neytenda. Þá telja samtökin sýnt að lágvöruverslanir hafi hækkað álagningu sína að undanförnu.

Neytendasamtökin minna á að lækkun á álögum stjórnvalda á matvælum var ætluð neytendum. Því sé það óásættanlegt að það hafi aðeins skilað sér til þeirra í upphafi en síðan hafi verslunin tekið þetta til sín.

Beina samtökin þeim tilmælum til viðskiptaráðherra að stjórnvöld kanni hvað valdi verðhækkunum. Einng telja samtökin ástæða til að láta kanna hvort samkeppnisaðstæður séu með ásættanlegum hætti innan matvöruverslunar.