Jóhanna skipar nefnd um félagslega þáttinn

Jóhanna Sigurðardóttir félagsmálaráðherra ætlar að skipa nefnd sem falið verður að efla hinn félagslega þátt húsnæðislánakerfisins. Frumvarp um það verður lagt fram á komandi þingi.

Í fréttatilkynningu frá félagsmálaráðherra segir að ákveðið hafi verið að vinna að því að efla hinn félagslega þáttinn um leið og lánshlutfall Íbúðalánasjóðs er lækkað í dag úr 90% í 80%.

Þetta á að gera með því að efla leigumarkaðinn og með lánveitingum til fólks undir skilgreindum eigna- og tekjumörkum, samhliða því að skýrar verði skilið á milli almennra og félagslegra lánveitinga, að því er segir í tilkynningunni.

Ástæðan fyrir lækkun lánshlutfallsins er sögð sú, að fasteignaverð hafi farið hækkandi á nýjan leik. Þetta hafi stuðlað að meiri verðbólgu og hærra vaxtastigi en ella sem mikilvægt sé að bregðast við.