Neyðumst til að taka upp evruna fyrr eða síðar

Íslendingar munu ekki komast hjá því að taka upp evruna á næstu árum að mati Þórólfs Matthíassonar, prófessors við viðskipta- og hagfræðideild Háskóla Íslands. Þetta kemur fram í viðtali sem birtist í nýjasta tölublaði Samiðnar, Sambands Iðnfélaga. Hann segir viðbúið að vextir muni lækka hér á landi við upptöku evrunnar og að verðtrygging muni heyra sögunni til.

Í viðtalinu segir Þórólfur það einungis vera spurning um þjóðarstolt en ekki þjóðhagslega hagkvæmni að Íslendingar séu ekki nú þegar búnir að taka upp evruna. Hann bendir á að evrusvæðið fari stöðugt stækkandi og stærð og umsvif íslenskra banka geri það að verkum að ómögulegt verði fyrir Íslendinga til langs tíma að halda í krónuna. Hún sé einfaldlega of veikur gjaldmiðill.

Þórólfur segir skynsamlegra af stjórnvöldum að stefna að aðild að Evrópusambandinu og upptöku evrunnar í stað í þess að reyna hægja á þeirri þróun.

Þá segir Þórólfur einboðið að vextir muni lækka til muna hér á landi taki Íslendingar upp evruna. Nú séu innlendir bankar í þægilegri stöðu hér á landi gagnvart almenningi sem ekki eigi auðvelt með að leita út fyrir landsteinana eftir viðskiptum. Evran muni hins vegar valda því að almenningur eigi greiðari aðgang að erlendum bönkum og hagstæðari lánum. Þá telur hann evran muni einnig valda því að verðtrygging muni heyra sögunni til.

Sjá nánar á á vef Samiðnar hér.