Lögreglan fær bíla og mótorhjól

Ríkislögreglustjóri afhenti lögreglustjóra höfuðborgarsvæðisins fyrr í dag þrjá nýja og vel útbúna lögreglubíla og eitt mótorhjól. Þetta eru fyrstu bílarnir af þeim tíu sem höfuðborgarlögreglan hefur óskað eftir á þessu ári.

Fram kemur í tilkynningunni frá lögreglunni að bílarnir séu allir af gerðinni Volvo S80, Turbo Disel. Einn þeirra er með fullkomnu tölvukerfi sem tengt er við Tetra-samskiptakerfið sem kemur til með að auðvelda vinnu á vettvangi því stefnt er að því að þar verði unnt að sjá ýmsar upplýsingar, svo sem ökuferilsskrá ökumanns, skráningu bifreiða og fleira.

Tveir bílanna leysa af hólmi eldri bíla umferðardeildar sem búið er að aka rétt tæplega 300.000 kílómetra. Þriðji bíllinn kemur í stað bifreiðar almennrar deildar sem skemmdist á síðasta ári.

Enn fremur kemur fram í tilkynningu lögreglu að á síðasta ári og í byrjun þessa árs hafi 29 ökutæki bæst við bílaflota lögreglunnar, flest vegna endurnýjunar. Áætlað sé að taka 25 ný ökutæki í noktun á þessu ári. Alls hefur lögreglan á landinu nú 161 ökutæki til afnota.