Mikil stemning í liðinu segir læknirinn

"Menn eru svolítið laskaðir en ekkert til að hafa stórar áhyggjur af," segir Brynjólfur Jónsson, læknir íslenska handboltalandsliðsðins á HM í Þýskalandi. Hann byrjaði að vinna með liðinu 1990 og hefur verið með þeim á 12 stórmótum. Hann segir mikla stemningu vera í liðinu.

Íslenskir áhorfendur eru farnir að flykkjast inní Gerry Weber höllina í Halle í Westfalen. Einn þeirra er Sigurður Petersen faðir Sigfúsar Sigurðassonar línumanns. Hann sagði að strákurinn hafi verið kátur þegar hann heyrði í honum í morgun. "Hann sagðist hlakka mikið til leiksins við Pólverja."

Ef Ísland sigrar Pálverja þá verða þeir efstir í milliriðlinum með sex stig og með góða möguleika á að leika um eitt af fjórum efstu sætunum í keppninni.

Leikurinn hófst klukkan 17:30. Frægasti leikur Íslendinga og Pólverja er eflaust einvígi liðanna í B-keppninni árið 1989, en þar mættust þjálfarar liðanna Alfreð Gíslason og Bogdan Wenta á vellinum og verða nú að gera sér að góðu að fylgjast með af hliðarlínunni.

Pólska landsliðið er grófasta liðið á HM til þessa samkvæmt stigagjöf Alþjóða Handknattleikssambandsins. Þessar niðurstöður eru reiknaðar út frá tveggja mínútna brottrekstrum og gulum og rauðum spjöldum. Suður-Kórea er þannig prúðasta liðið á HM fyrir keppni dagsins í dag, en íslenska liðið er þar í 14. sæti.

Frekari fréttir af keppninni á HM 2007 vef Vísir.is