Tap RÚV um 420 milljónir á fyrri helmingi ársins 2006

Menntamálaráðherra var harðlega gagnrýndur við upphaf þingfundar fyrir að svara því fyrst í dag hver fjárhagsstaða Ríkisútvarpssins væri og var bent á að skuldir RÚV frá 1. janúar til 30. júní í fyrra hefðu nemið 420 milljónum króna og að uppsafnaðar skuldir stofnunarinnar væru 5,2 milljarðar króna. Var farið fram á að atkvæðagreiðslu um frumvarpið yrði frestað vegna þessara nýju upplýsinga.

Það var Kolbrún Halldórsdóttir, þingmaður Vinstri - grænna, sem kvaddi sér hljóðs um störf þingsins og benti á að hún hefði loks fengið svar við fyrirspurn til menntamálaráðherra um fjárhagsstöðu RÚV. Gagnrýndi hún að svarið bærist sama dag og atkvæði ætti að greiða um frumvarp um Ríkisútvarpið ohf. Sagði hún þetta lýsandi dæmi um vinnubrögðin í öllu málinu.

Þorgerður Katrín Gunnarsdóttir menntamálaráðherra sagði ekkert nýtt koma fram í svarinu sem Kolbrún hefði ekki séð í starfi sínu innan menntamálanefndarinnar en að mestu skipti að ætlunin væri að Ríkisútvarpinu yrði tryggt 15 prósenta eiginfjárhlutfall þegar það tæki til starfa sem hlutafélag.

Fram kom í máli þingmanna Vinstri - grænna að samkvæmt svari ráðherra hefði tap RÚV verið um 50 milljónir árið 2004, um 200 milljónir árið 2005 og 420 milljónir á fyrri helmingi síðasta árs. Spurðu þingmenn hvernig stæði á þessu mikla tapi stofnunarinnar og hvers vegna hefði dregist að svara fyrirspurinni.

Sagði Ögmunduir Jónasson um grafalvarlegar upplýsingar að ræða sem hefðu átt erindi inn í umræðu um RÚV-frumvarpið. Beðið hefði verið eftir svari frá ráðherra frá því í desember. Þá gekk Mörður Árnason, þingmaður Samfylkingarinnar, svo langt að saka menntamálaráðherra um að leyna upplýsingum í málinu.

Þá benti Kolbrún Halldórsdóttir á það að upplýsingar í svari ráðherra væru ekki þær sömu og menntamálanefnd hefði fengið og þá væri ekki búið að tryggja að eiginfjárhlutfall RÚV yrði 15 prósent. Til þess þyrfti fjármagn frá Alþingi. Menntamálaráðherra sakaði hins vegar stjórnarandstöðuna um að vaða reyk og villu í málinu.

Eftir að sá tími sem ætlaður er til umræðna um störf þingsins hófust umræður um fundarstjórn forseta og þar sagði Sigurður Kári Kristjánsson, formaður menntamálanefndar, að það væri engu líkara en að stjórnarandstaðan væri með fráhvarfseinkenni frá málþófi í síðustu viku. Skýrt hefði verið greint frá því hver staða RÚV væri og gert ráð fyrir skuldum stofnunarinnar í fjáraukalögum ársins.