Amazon-geimfar á loft

Miljarðamæringurinn Jeff Bezos sem stofnaði Amazon.com hefur skotið geimfari á loft. Geimfarið flaug 85 metra upp í loftið og lenti aftur mjúklega.

Bezos rekur geimverkfræðifyrirtækið Blue Origin þar sem verkfræðingar hanna og smíða geimför.

Tilraunin fór fram á afskekktum stað í Texas í nóvember 2006 en nú hafa myndir og gögn verið gerð opinber. Myndskeiðið er frá tilraunarskoti geimfarsins. Þetta er í fyrsta skipti sem hulunni er svipt af áætlunum geimferðafélags Bezos.

„Við erum þolinmóð og vinnum skref fyrir skref að lágfargjaldageimferðum svo að margir geti ferðast í geimnum og að mannkynið geti kannað alheiminn betur,“ segir Bezos á heimasíðu félagsins.

„Það mun taka langan tíma á klára þetta verkefni en við vinnum markvisst að því,“ sagði Bezos að lokum.