Hótel í Osló kært vegna kynþáttamismununar

Miðstöð gegn kynþáttahatri í Noregi hefur kært framferði forsvarsmanna hótels í Olsó til lögreglu eftir að hópi Kúbverja var neitað um gistingu á hótelinu. Vísað er til greinar í hegngingarlögum sem kveða á um að ekki megi mismuna fólki út frá þjóðerni þess eða kynþætti.

Kúbverjarnir eru staddir í Noregi til þess að taka þátt í ferðaþjónusturáðstefnu og hafa búið á hótelinu, sem ber hið skemmtilega nafn Köngulóin, í síðustu fimm heimsóknum sínum. Nú ber hins vegar svo við að bandaríska hótelkeðjan Hilton hefur keypt hótelið og þar sem viðskiptabann er í Bandaríkjunum gagnvart Kúbu var Kúbverjunum neitað um herbergi á hótelinu.

Fram kemur á fréttavef Verdens Gang að forsvarsmenn Miðstöðvar gegn kynþáttahatri telji hins vegar að fyrirtækinu beri að fylgja norskum lögum sem kveði á um bann við mismunun sem þessari. Yfirvöld hafa þegar hafið rannsókn á málinu.