Deilt um barnabætur við upphaf þingfundar

Stjórnarandstæðingar héldu því fram að tölurnar sýndu að framsóknarmenn hefðu svikið kosningaloforð sín en það hefði aðeins verið í fyrra og í ár sem auknir fjármunir hefðu verið lagðir til barnabóta. Árin þar á undan allt frá 1995 hefðu barnabætur hins vegar minnkað miðað við fast verðlag ársins 2005. Var stjórnin sökuð um að taka peninga frá barnafjölskyldum og færa þá þeim sem mestar tekjurnar hefðu.

Árni M. Mathiesen fjármálaráðherra benti hins vegar á að ákvarðanir um hækkun barnabóta hefði verið tekin fyrir tveimur árum og þá hefði verið ákveðið að greiða barnabætur til 18 ára aldurs. Sagði Árni enn fremur að kaupmáttur hópanna sem um ræddi hefði batnað stórkostlega. Því hefðu stjórnarandstöðuþingmenn ekki fagnað. Þeir sæju ekki hvað hefði verið gert á undanförnum árum vegna þess að þeir vildu það ekki.

Jóhanna Sigurðardóttir, þingmaður Samfylkingarinnar, sagði hins vegar að fjármálaráðherra hefði ekki minnst á að það væru ekki allir sem fengju barnabætur til 18 ára aldurs barna og þá benti hún á að barnabætur byrjuðu að skerðast hjá einstæðum mæðrum við 90 þúsund króna markið. Ísland væri eitt þriggja ríkja innan OECD sem væri með tekjutengdar barnabætur.

Í kjölfar umræðunnar hófust svo atkvæðagreiðslur um frumvörp og þingsályktunartillögur og hafa 19 frumvörp þegar verið samþykkt sem lög. Alls eru 55 mál á dagskrá þessa þingfundar. Samþykkja hefur þurft afbrigði frá þingsköpum þar sem of stutt er liðið frá síðustu umræðu um málin, en hún fór fram fyrr í dag.