Fara leikmenn Galaxy fram á launahækkun?

Fyrirliði LA Galaxy, Peter Vagenas, bandaríska liðsins sem David Beckham mun ganga til liðs við næsta sumar, setur spurningamerki við þær gríðarlegu fjárhæðir sem Beckham mun fá fyrir að spila fyrir liðið. Hann útilokar ekki að einhverjir leikmanna liðsins munu fara fram á launahækkun.

Talið er að Beckham fái 128 milljónir punda á þeim fimm árum sem samningur hans við Galaxy er í gildi og segir Vagenas augljóst að Beckham sé snillingur í samningaviðræðum.

“Vitur maður sagði mér eitt sinn að þú værir jafn mikils virði og þú næðir að semja um. En á sama tíma hljóta að vera einhver takmörk fyrir ósamræminu milli hans og annara leikmanna liðsins,” segir Vagenas.

“Ég meina, hann er ekki að stela peningunum svo að það verður að hrósa honum fyrir að hámarka arðsemi sína. Hins vegar spyrjum við hinir okkur óhjákvæmilega: “Af hverju getum við ekki fengið smá hluta af þessum peningi?”