Bob Woolmer var kyrktur

Lögreglan á Jamaíku segir að Bob Woolmer, fyrrverandi þjálfari pakistanska krikketlandsliðsins, hafi verið kyrktur. Woolmer fannst meðvitundarlaus á hótelherbergi í Kingston á sunnudagsmorgun, daginn eftir að pakistanska liðið féll óvænt úr leik á heimsmeistaramótinu á Jamaíku. Hann lést svo á sjúkrahúsi sama dag.

Lögregla hefur hingað til lítið viljað tjá sig um dánarorsök Woolmers en réttarmeinarannsókn hefur leitt í ljós að hann var kyrktur. Lögregla veit ekki hvort fleiri en einn komu að morðinu en segir hugsanlegt að Woolmer hafi þekkt morðingjann eða morðingjana þar sem engin merki eru um að brotist hafi verið inn á hótelherbergið.

Lögreglan yfirheyrði í gær leikmenn pakistanska landsliðsins vegna dauðsfallsins og ekki liggur fyrir hvort liðið fær að halda heim til Pakistans á morgun eins og til stóð vegna rannsóknar málsins.