Vilja kláf og veitingahús á Eyrarfjall

Tveir ungir Ísfirðingar, Skafti Elíasson og Úlfur Þór Úlfarsson, hafa stofnað fjárfestingafélag með það að markmiði að koma dráttarkláfi upp Eyrarfjall og reisa þar veitingahús.

Ísafjarðarbær stendur við Eyrarfjall, sem er um 640 metra hátt. Kostnaðaráætlun hljóðar upp á 450 til 500 milljónir en Skafti og Úlfur er bjartsýnir á að fjárfestingin gefi af sér arð. „Okkur reiknast að við þyrftum um 30 þúsund ferðamenn á ári til að þetta borgi sig," segir Skafti.

„Og teljum það raunhæfan möguleika. Hingað koma um 20 þúsund ferðamenn á ári úr skemmtiferðaskipunum einum saman. Fjöldi slíkra siglir líka fram hjá en kæmi líklega í land ef eitthvað þessu líkt væri á boðstólunum."

Skafti á steypustöð á Ísafirði en Úlfur rekur verslun. Þeir hafa nú stofnað fjárfestingafélagið Eyrarkláf og gera sér vonir um að safna 250 milljónum króna á næstu tveimur árum. „Við miðum við að ná 50 prósenta eiginfé á næstu tveimur árum. Ef það gerist verður kýlt á þetta, annars fær fólk endurgreitt."

Hugmyndina segir Skafti upphaflega mega rekja til Hannibals Valdimarssonar ráðherra. „Fyrir um ári var Úlfur að rifja þessa hugmynd hans upp. Þá vildi svo til að ég var nýkominn frá London, þar sem ég fór með kláfi í London Eye og sá hverslags peningavél það er. Þannig að ég lagði til að við réðumst bara í þetta."

Eftir að hafa leitað til bæjar- og flugmálayfirvalda og gengið úr skugga um að ekkert væri því til fyrirstöðu að leggja kláf upp fjallið höfðu Skafti og Úlfur samband við tvö fyrirtæki og báðu þau um að gera tilboð. Í vor kom fulltrúi austurríska kláfaframleiðandans Doppelmeyer til Ísafjarðar og gerði úttekt á aðstæðum. Í kjölfarið barst Skafta og Úlfi tilboð og þeir settu fjárfestingafélagið á laggirnar.

Skafti játar að þeir hugsi stórt en þó innan marka raunsæis. „Ef við ætlum að græða pening á ferðamennsku verðum við að hafa eitthvað bitastætt til að laða ferðamennina að. Sóknarfærin á Vestfjörðum er mörg. Við getum ekki, þurfum ekki og ættum ekki að stóla eingöngu á fisk."