Gleymda vinstristjórnin

Eftir 16 ár af ríkisstjórnum Sjálfstæðis- og samstarfsflokks hefur nú runnið upp sá tími sem hver einasti hægrimaður hefur óttast lengi: Kjósendur hafa gleymt því hvernig íslenskir vinstrimenn stjórna landinu.

Góðærið er slíkt, og tíminn orðinn það langur frá seinustu vinstristjórn, að sveitarfélög eru byrjuð að afþakka störf, fjármálafyrirtækjum er hótað með skattavendinum fyrir að skila of miklum hagnaði, farsælum útgerðarfyrirtækjum er hótað með eignaupptöku á kvóta, atvinnuástandinu góða er bölvað fyrir að vera þensluhvetjandi og svona má lengi telja. Kjósendur hafa með öðrum orðum gleymt því hvernig vinstrimenn fara með völdin á Íslandi.

Nú mætti eflaust spurja sig að því hvort ekki sé kominn tími á „breytingar“ og skipta hinum jakkafataklæddu og kynköldu peningamönnum út fyrir nútímalega og kynæsandi „græna“ stjórnmálamenn sem vilja „velferð“ og „jöfnuð“ í stað starfa og stöðugleika. Svarið við þeirri spurningu er nei. Reykvíkingar fengu nýverið nóg af sínum vinstrimönnum eftir 12 ára sjóðasukk og misheppnuð fjárfestingarævintýri. Af hverju ekki að nota þá reynslu til að minna okkur á stjórnunarhæfileika íslenska vinstrisins?

Sagan á það vissulega til að endurtaka sig, en er slíkt alltaf nauðsynlegt þegar hún er svo fyrirsjáanleg og umvafin dæmisögum úr íslenskum sveitarfélögum og ógnvekjandi kreppusögum úr fortíð? Ekki þykir mér það.

Höfundur er verkfræðingur.

Reykvíkingar fengu nýverið nóg af sínum vinstrimönnum eftir 12 ára sjóðasukk og misheppnuð fjárfestingarævintýri.