Gífurleg eyðilegging í stórbruna í miðbæ Reykjavíkur

Gífurleg eyðilegging varð í miðbæ Reykjavíkur í gær þegar húsin að Lækjargötu 2 og Austurstræti 22 urðu eldi að bráð. Allt tiltækt lið lögreglu og slökkviliðs höfuðborgarsvæðisins barðist við eldinn í allan gærdag.

Engin slys urðu á fólki þegar eldurinn braust út eða í aðgerðum á staðnum. Talið er að eldsupptök hafi verið í söluturni sem stendur á milli húsanna sem eru tvö af þeim elstu og sögufrægustu í Reykjavík. Ljóst er að mikið menningarsögulegt tjón hefur orðið. Húsið við Lækjargötu 2 er stórskemmt og húsið við Austurstræti 22 er gjörónýtt.

Tilkynnt var um eldinn laust fyrir klukkan tvö í gær og var allt tiltækt lið lögreglu og slökkviliðs á höfuðborgarsvæðinu þegar sent á staðinn. Voru um 100 manns, bæði lögreglu- og slökkviliðsmenn, á vettvangi þegar mest var. Reyk-kafarar fóru inn í húsin strax við komuna á vettvang og lögregla hófst handa við að rýma svæðið. Voru starfsskilyrði slökkviliðs afar erfið í allan gærdag á meðan slökkvistörfum stóð.

Jón Viðar Matthíasson slökkviliðsstjóri segir ljóst að slökkviliðsmenn hafi lagt sig í mikla hættu en slökkvistarfið hafi gengið vonum framar miðað við hversu aðkoman var ljót. „Við þurftum að rífa þakið af Austurstræti 22 vegna þess hvað var mikil hrunhætta og ég treysti því ekki að senda inn menn í þessar hættulegu aðstæður.“ Jón Viðar telur að eldvarnir húsanna hafi ekki verið nægilega góðar, enda séu húsin gömul og erfitt að koma slíku við.

Björn Karlsson, forstöðumaður Brunamálastofnunar, segir ljóst að eldvörnum hafi verið ábótavant í húsunum. „Annars hefði eldur ekki náð svona langt. En það er erfitt að fara að ítrustu kröfum í brunavörnum í gömlum friðuðum húsum því þau eru byggð eftir gömlum reglugerðum.“ Björn segir að við nýja starfsemi, eins og veitingahúsarekstur, verði að uppfylla byggingareglugerðir á þeim tíma. Það er hins vegar ekki alltaf hægt.“ Björn segir að eldvarnareftirlit þurfi stundum að slaka á kröfum vegna þess að viðkomandi hús sé menningarverðmæti og þeim megi ekki breyta.

Talið er að eldurinn hafi kviknað út frá loftljósi í söluturni sem stendur á milli húsanna tveggja, að sögn Stefáns Eiríkssonar, lögreglustjóra höfuðborgarsvæðisins.

Þórður Halldórsson, vettvangsstjóri lögreglunnar, segir að þrátt fyrir að mikinn fjölda fólks hafi drifið að og fylgst með brunanum hafi gengið mjög vel að rýma svæðið. „Fólk hefur verið mjög samvinnufúst og farið eftir öllum fyrirmælum lögreglu.“

Slökkviliðsmenn Brunavarna Suðurnesja stóðu vaktina í höfuðstöðvum Slökkviliðs höfuðborgarsvæðisins eftir að allt tiltækt slökkvilið af höfuðborgarsvæðinu hafði verið sent á vettvang. Þeirra hlutverk var að manna slökkvistöðina til að annast önnur útköll ef af yrði. Reykjarkófið frá eldinum sást úr nágrannabyggðarlögunum en reykurinn lagðist yfir miðborgina, bæði til suðurs og vesturs.