Kostaði meira en hálfa milljón að laga skemmdir

Kristinn Guðmundsson, umsjónarmaður Fasteignafélagsins Stoða, segir kostnað vegna skemmda á verslunar­miðstöðinni Grímsbæ við Bústaðaveg hljóða upp á 572.889 krónur á síðasta ári. "Stærstur hluti kostnaðarins var lagfæringar vegna flísa- og rúðubrota.

Þá er kostnaður við hreinsun veggjakrots í ár kominn upp í sextíu þúsund krónur, sem er veruleg aukning frá í fyrra. Veggjakrotið er háþrýstiþvegið og kostar hver þvottur á milli tuttugu til þrjátíu þúsund krónur. Þá hefur verið krotað á veggi innan­dyra en leigjendur hússins hafa séð um að mála þann hluta þannig að kostnaður við að fá málara á staðinn hefur sparast." Kristinn segir tjón af völdum skemmdarverka í Grímsbæ mikið miðað við aðrar sambærilegar byggingar í Reykjavík á vegum Stoðar.

Kristinn segir að til tals hafi komið að setja upp eftirlitsmyndavélar á staðnum en sá kostnaður sé í kringum 800 þúsund krónur.

Grímur Þórisson, formaður húsfélagsins í Grímsbæ, hefur rekið Rakarastofu Gríms í húsinu undanfarin fimmtán ár og segir umgengni í Grímsbæ hafa versnað og fleiri skemmdarverk séu unnin þar nú en áður. "Ástandið versnaði til muna eftir að 10-11 opnaði verslun í húsinu en hún er opin fram á kvöld og þá eru meiri líkur á sóðaskap og skemmdum." Grímur segir að reynt hafi verið að tala við krakkana en það hafi engan árangur borið, í og með vegna þess að skemmdarvargarnir séu sjaldnast þeir sömu.

"Aðkoman eftir helgarnar er oft ljót og stundum er búið að rífa upp plöntur sem eru á göngum verslunarmiðstöðvarinnar. "Grímsbær var gerður upp fyrir þremur árum og á meðan framkvæmdir stóðu yfir var mikið um innbrot og stuld. Á þeim tíma voru gluggar einnig opnaðir, að því er virtist í þeim tilgangi að tryggja sér athvarf inn í verslunarmiðstöðina eftir lokunartíma verslana."

Grímur vill sjá öflugara foreldraeftirlit í hverfinu og er einnig óhress með hversu lítið eigendur Grímsbæjar hafa gert í málunum. "Það er löngu tímabært að koma upp eftirlitsmyndavélum við húsið og einnig þarf að bæta lýsingu í kringum það til muna því skemmdarverk eru oft unnin í skjóli myrkurs."