Útvarpsstjóri RÚV las fréttir á Bylgjunni í dag

Gamlir fréttamenn og útvarpsmenn af Bylgjunni snúa aftur að hljóðnemanum í tilefni af tvítugsafmæli Bylgjunnar, meðal annarra mætti Páll Magnússon útvarpsstjóri Ríkisútvarpsins í hljóðver og las fréttir klukkan ellefu. Auk Páls Magnússonar munu Elín Hirst, Sigursteinn Másson og fleiri lesa okkur fréttirnar á Bylgjunni í dag.

Fyrir tuttugu árum ræsti Jón Ólafsson útsendingar Bylgjunnar eftir að leyfi til útvarpsrekstrar voru gefin frjáls. Mikill afmælisfagnaður hefur staðið frá því á föstudaginn og nær hann hámarki í dag. Starfsmenn NFS óska Bylgjunni að sjálfsögðu til hamingju með afmælið og óska velfarnaðar á komandi árum.