Forstjóri Umhverfisstofnunar svarar gagnrýnni úttekt Ríkisendurskoðunar

Davíð Egilson, forstjóri Umhverfisstofnunar, gerir verulegar athugasemdir við aðferðir og framkvæmd stjórnsýsluúttektar Ríkisendurskoðunar á starfsemi Umhverfisstofnunar. Hann segir vanta í úttektina útlistun á því hvernig úttektin var framkvæmd og hvaða gögn voru lögð til grundvallar. Fyrir vikið sé erfitt að greina milli staðreynda og huglægra atriða. Davíð segir að sumar tilvitnanir séu ekki rétt eftir hafðar þrátt fyrir óskir um leiðréttingar.

Þá lýsir forstjóri Umhverfisstofnunar sig ósammála niðurstöðum Ríkisendurskoðunar varðandi forgangsröð, faglegan ávinning og samskiptin við umhverfisráðuneytið. Hann er líka ósammála því, að breytt skipulag án aukinna fjármuna og mannafla muni gera stofnuninni betur kleift svo neinu nemi að sinna þeim verkum sem henni eru falin. Loks telur hann ályktanir um sparnað vegna flutnings starfsemi frá Akureyri til Reykjavíkur mjög vafasamar.

Davíð segir Umhverfisstofnun sinna fjárfrekum verkefnum með takmörkuðum fjárveitingum. Þannig sé rekstur og uppbygging þjóðgarða og annarra friðlýstra svæða mun fjárfrekari en þær fjárveitingar sem stofnunin fær.

Vinna við innleiðingu og framkvæmd alþjóðlegra skuldbindinga sem Ísland hefur gengist undir sé líka langt umfram fjárveitingar sem veitt er til þeirra verka.

Forstjóri Umhverfisstofnunar segir að meginviðfangsefni Ríkisendurskoðunar hafi átt að vera að greina hvort nauðsynlegt fjármagn hafi fylgt auknum verkefnum sem lögð hafa verið á stofnunina. Úttektin hafi hins vegar fyrst og fremst beinst að öðrum atriðum sem öðru fremur voru afleiðing aukin álags og fyrir liggur að með þessu missti hún sjónir á megintilgangi verkefnisins.

Umhverfissráðuneytið hefur líka brugðist við úttekt Ríkisendurskoðunar og falið Sigurði H. Helgasyni stjórnsýslufræðingi að gera frekari athugun á starfsemi, stjórn og rekstri Umhverfisstofnunar í kjölfar stjórnsýsluúttektar Ríkisendurskoðunar.