Er þetta ekki bara fullkomnað

16 liða úrslitin búin og liðin átta fá tveggja daga hvíld til föstudags, þá fjórir leikir, svo tveir, og svo úrslit, keppninnar vegna þá verða vonandi Þjóðverjar heimamenn í úrslitum, en margir aðrir kostir álitlegir.

Ég var mjög hissa á Spánverjunum í Frakkaleiknum, sá gamli hershöfðingi Aragones skildi ekki leggja upp nýja hluti varðandi sóknarleikinn, allt fullt af fínum leikmönnum í liðinu, en þeir leyfðu Frökkunum að spila leikinn á sinn hátt. Ég held að það hafi komið í bakið á þeim, hvað Aragones var búinn að gera miklar breytingar á liðinu í riðlakeppninni, þetta var ekki lið heldur hópur einstaklinga, og Frakkamegin breyttist leikurinn algerlega þegar Patrik Vieira tók í sínar hendur að stjórna liðinu, átti strax sendingu innfyrir og gerði svo annað markið. Skiptingarnar þrjár í seinni hálfleik komu líka kannski of fljótt, eða hvað, skiptir ekki máli, þeir eru úr leik. Brassarnir fóru svo furðu létt með Ghana, sem spiluðu vel, en gátu ómögulega klárað færin. Þarna skilur á milli góðra liða og frambærilegra, en vilji þeirra og kraftur var aðdáunarverður.

Á morgun er frí frá HM, líka á fimmtudaginn, sem er hálfgerð synd, annar kapituli þessarar keppni búinn, sá þriðji á föstudag og laugardag. Ég hlakka til, jafnvel þótt mótið hafi að mörgu leyti spilast einsog vísustu menn spáðu fyrir um, þá er óvissan samt alger, einn leikur, áfram eða heim. Ég flýg til Berlínar eftir rétta vikur og það verður gaman að segja fréttir og skila stemningu beint frá þessari sögulegu borg í 442.