Öskrandi fjör útá götu

Gott kvöld, góðir gestir, þvílíkur opnunarleikur á HM, 4-2, og að sitja í þessum helgidómi, á nýja Munchenarvellinum, fánar í regnbogans litum, innfluttur amerískur bjór sem allir Þjóðverjar bölvuðu, en frábær fótbolti. Stuðningsmenn Kosta Ríka voru einsog arineldur í einu horni vallarins, allir í rauðu: Olé, Olé, Tigo, Tigo, stundum jafnvel háværari en þýsku áhorfendurnir, en þegar fyrsta markið kom eftir fáeinar mínútur, sprakk allt í loft upp.

Stemningin var jafn steindauð, þegar Kosta Ríka jafnaði, líktog einhver sem var nákominn þýska liðinu hefði dáið langt fyrir aldur fram. Næstum þögn. En jafnvel þótt Þjóðverjarnir hefðu getað leikið betur, sérstakleg aí vörninni, og Jens Lehmann, guð minn góður, tvö skot, tvo mörk, þá var þetta fín byrjun. Þeir eru með frábæra miðju og svo Klose, sem virðist geta klárað hvaða færi sem er. Ég hef líka gaman af Jurgen Klinsmann þjálfara, frábær sóknarmaður sjálfur og hann leyfir sér að koma með stemningu og lífsgleði í þýska liðið, hefur ekki veitt af.

Nú er kvöld í stóru borginni, stærsta sveitaþorpi í heimi segja margir heimamenn, en samt er öskrandi fjör útá götu, nýárskvöld, gott ef ekki, einn sigur í höfn, þrjú stig takk. Veit ekki með Pólverja, sat við hliðina á pólskum blaðamanni á leiknum í dag, Thomasi Wlodarczyk, hann hefur jafnvel minni trú á sínum mönnum en ég, tveir góðir leikmenn í liðinu, kannski þrír og tapið í kvöld sýnir að þeir eru ekki á leiðinni eitt eða neitt. ,,40% líkur á því að þeir vinni Þjóðverja'' sagði hann, jafnvel minna, bætti ég við, en í kvöld eru aðeins þrír litir í regnboganum í Bæjaralandi, Svart, hvítt og rautt, þýskt, já takk, þeir eiga heiminn næstu klukkutímana, svo á morgun: Nýr HM dagur, þar sem allt getur gerst.