Afhausun í beinni í stuttmynd Ara

Kvikmyndagerðamaðurinn Ari Alexander Ergis sýnir stuttmyndina sína Arabíska nætur á undan mynd Michael Winterbottom, The Road to Guantanmo, laugardaginn 7.október klukkan tíu á Alþjóðlegu kvikmyndahátíðinni í Reykjavík.

Mynd Ara er nokkuð sláandi en í forgrunni er aflífun Jack Kensley, bandarísks hermanns sem tekinn var til fanga og afhausaður í beinni útsending á veraldarvefnum. Íraksstríðið hefur verið gagnrýnt töluvert að undanförnu en Ari segist ekki vera að taka afstöðu til þess með myndinni. "Ég finn jafnmikið til með Bandaríkjamönnum, Írökum og svo þeim sem telja á sig ráðist. Arabískar nætur er kannski ekki beint gagnrýni á Íraksstríðið sem slíkt heldur stríðsrekstur í heild sinni, samanber stríðið í Tsjetsjeníu þar sem Rússar fara offari. Sagan endurtekur einfaldlega aftur og aftur," segir Ari.

"Ég notast við klippur af netinu, svokallað snuff dót og blanda því saman við fréttamyndir," útskýrir Ari sem segist vera undir miklum áhrifum frá Tag der Freiheit, mynd eftir Leni Riefenstahl sem gerð var eftir hina umdeildu kvikmynd Sigur viljans. "Nasistum fannst þýska vélin ekki vera sýnd nægilega mikið í Sigri viljans og fannst því tilvalið að sýna styrk þýska stálsins enn frekar," segir Ari og bætir því jafnframt við að áhrifa Chaplin gæti einnig enda hafi hann gert The Great Dictator þar sem óspart hafi verið gert grín að áróðursaðferðum þriðja ríkisins. "Við sjáum þessa sömu hluti gerast hjá Bandaríkjunum þar sem stórar og flottar þyrlu og flugvélar eru sýndar í fullri action."

Ari segist hafa fylgst vel með gangi mála í Írak. "Myndin var frumsýnd á sunnudaginn og við vorum tilbúnir með hana á laugardeginum.

Þetta er afrakstur margra mánaða vinnu og á Arnar Ívarsson sem sér um tölvugrafíkina alveg sérstakt hrós skilið sem og Þór Eldon en hann semur tónlistina," útskýrir Ari sem fannst tímasetningin á sýningu myndarinnar eiga sérstakleg við nú þegar kvikmyndin um fangabúðirnar á Kúbu rataði á Alþjóðlegu kvikmyndahátíðina í Reykjavík. "Kvikmyndahátíðin á mikið hrós skilið fyrir að sýna þær myndir sem eflaust aldrei hefðu komið í bíó og gestirnir tveir á mánudagskvöldinu, þeir Rhuhel Ahmed og Asif Iqbal, höfðu mikil áhrif á mig sem og aðra sem þarna voru staddir," segir Ari.