Fjögur hringormasmit í fólki

Á undanförnum tveimur árum hafa greinst fjögur tilfelli af hringormasmiti í mönnum á Tilraunastöð Háskólans að Keldum. Þeir sem smitast hafa eiga það sameiginlegt að hafa borðað hráan eða illa soðinn fisk, að því er segir í Farsóttafréttum Landlæknis.

Fyrstu tveir einstaklingarnir smituðust af því að borða hráan steinbít. Sá þriðji smitaðist af því að borða vanhitaða þorsklifur. Sá fjórði hafði borðað sushi-mat. Líklegt má telja að sjómaður sem át hrá loðnuhrogn hafi smitast árið 2003, en ormurinn, sem fannst í botnlanga hans við skurðaðgerð, var ekki sendur til greiningar.

Smit af völdum hringorma er sjaldgæft. Þau tilfelli sem hafa greinst að undanförnu hér á landi eru af völdum selorma. Á heimsvísu er smit af völdum hvalorma þó algengara og geta þeir í stöku tilvikum valdið alvarlegri einkennum frá kvið en selormarnir. Oftast eru þó einkennin væg, en fólki bregður í brún þegar ormarnir skríða upp í kok eða finnast í hægðum enda eru þeir 3-4 sm langir.

Hugsanlega er um að ræða aukningu hér á landi á smiti af völdum hringorma. Kann aukin neysla á hráum fiskafurðum að valda því, en einnig kann aukning á hringormum í lífríki hafsins í kringum landið að skipta máli.