Vill skipa sér í forystusveit

Hanna Birna Kristjánsdóttir, borgarfulltrúi Sjálfstæðisflokksins, hefur ákveðið að gefa kost á sér í annað sæti framboðslista flokksins fyrir borgarstjórnarkosningarnar á næsta ári. "Mig langar til þess að skipa mér í forystusveit borgarstjórnarflokksins og halda áfram með þau mál sem við höfum unnið að," segir Hanna Birna. "Mig langar líka að halda áfram að vinna fyrir Reykvíkinga og tel að ég geri það best svona." Aðspurð segist Hanna Birna fyrir löngu síðan hafa tekið ákvörðun um að sækjast ekki eftir fyrsta sæti listans að sinni. Mjög hæfur maður sinni oddvitahlutverki flokksins nú og aðrir sem rætt hafi verið um í fyrsta sæti listans séu einnig hæfir. "Þessi ákvörðun ræðst einnig af því að ég er aðstoðarframkvæmdastjóri Sjálfstæðisflokksins og tel þetta tvennt ekki fara saman," segir Hanna Birna. Hanna Birna segist ekki hafa skipulagt framboð sitt með ákveðinn frambjóðanda í fyrsta sæti listans í huga. "Einungis einn hefur lýst yfir framboði sínu í fyrsta sætið. Það er oddviti okkar og ég styð hann heilshugar," segir Hanna Birna.