Vilja styrkja háskóla enn frekar

Tímamót urðu í sögu háskólastigsins í morgun þegar rektorar allra háskóla landsins undirrituðu sameiginlega yfirlýsingu um að styrkja háskólana enn frekar og standa vörð um akademískt frelsi. Þetta er í fyrsta skipti sem íslenskir háskólar gefa út sameiginlega yfirlýsingu um forsendur háskólastarfs og akademískt frelsi, en hún var undirrituð í hástíðarsal Háskóla Íslands í morgun. Í henni kemur fram að hlutverk háskóla sé að skapa skilyrði til frjálsrar þekkingarleitar, þekkingarsköpunar, varðveislu og miðlunar á sviði vísinda, fræða og lista. Segir að með starfsemi sinni þjóni háskólar fræðunum og langtímahagsmunum samfélagsins. Kveðið er á um þá stjórnunarhætti sem standa vörð um akademísk frelsi sem felur í sér að einstaklingur geti leitað þekkingar og tjáð sannfæringu sína án þess að eiga á hættu að það bitni á starfsöryggi hans eða öðrum mikilvægum hagsmunum. Í sameiginlegri yfirlýsingu háskólarektoranna kemur einnig fram að háskólar skuli haga ráðningum og framgangi akademískra starfsmanna samkvæmt faglegu matsferli. Einnig hefur verið ákveðið að koma á samstarfi á milli skólanna um margvísleg fagleg háskólamálefni og verður stefnt að því að skólarnir standi sameiginlega að ýmsum verkefnum í þágu fjölbreyttrar og góðrar háskólamenntunar sem standist alþjóðlegar kröfur.