Rökleysa og þvættingur

Samtök myndrétthafa á Íslandi eru harðorðir vegna niðurstöðu lögmanns Neytendasamtakanna um áskriftir að SKY sjónvarpsstöðvunum á Íslandi þar sem kemur fram að Íslendingar sem hafi slíka áskrift séu ekki að brjóta gegn reglum. Í tilkynningu frá SMÁÍS segir meðal annars að yfirlýsing Neytendasamtakanna sé rökleysa og þvæla. Ekki geti það verið neytendum óviðkomandi ef lög hafa verið brotin til að koma vörunni til skila. Með dreifingu SKY á Íslandi sé verið að brjóta höfundarlög, skattalög, útvarpslög og áskriftarskilmála SKY. Hallgrímur Kristinsson, framkvæmdastjóri SMÁÍS, segir að það sem Neytendasamtökin séu að taka undir sé áþekka því að hvetja neytendur til að kaupa smyglað áfengi, sem vissulegra sé ódýrara. Ekki var lokað um síðustu mánaðarmót fyrir áskrifendur SKY sem nota íslensk kreditkort, en Hallgrímur segir það misskilning að SMÁÍS hafi verið í samskiptum við SKY. "Við töluðum við þá rétthafa sem eru að selja efni til Bretlands og viljum að SKY standi við sína sáttmála. Þessir rétthafar komu aftur til okkar með þau skilaboð að SKY ætlaði að loka á íslensk kreditkort."