Íslandsmiðill og Tengir fá boltann

Magnús Ragnarsson, framkvæmdastjóri Íslenska sjónvarpsfélagsins, segir að engin beiðni liggi fyrir frá Digital Ísland um dreifingu á Enska boltanum. "Komi sú beiðni getum við óskað þess að okkar myndlykill verði notaður." Þá segir Magnús að ekki verði hægt að dreifa efninu á úreltu örbylgjukerfi sem Digital Ísland styðst við. "Það er úrelt að því leyti að í gegnum örbylgjukerfið getur útsendingin aldrei verið gagnvirk. Gagnvirk þjónusta okkar byrjar nú með stærri kynningu þegar líður á haustið. Ég reikna samt ekki með miklu samstarfi við Digital Ísland, þar sem þegar er komin beiðni um að Skjár einn fari á Digital, sem hefur verið hafnað." Bráðabirgðaúrskurður samkeppniseftirlitsins byggir á kærum tveggja fyrirtækja, Íslandsmiðils og Tengis á Akureyri, en bæði fyrirtækin hafa óskað eftir því að fá að dreifa Enska boltanum. "Við munum afhenda þeim myndlykla okkar og sjónvarpsmerki," segir Magnús. "Ef það gengur upp tæknilega er kominn tími til að ganga frá viðskiptalegum forsendum. Við munum gera kröfu um að rekið sé þjónustuver og reikningagerð við okkur."