GR vill stækka völl á Korpu

Golfklúbbur Reykjavíkur vill stækka golfvöllinn á Korpu úr 18 holum í 27. Til greina kemur að borgin byggi á fyrstu braut. Hjördís Rut Sigurjónsdóttir. Gestur Jónsson, formaður Golfklúbbs Reykjavíkur og lögmaður, hefur verið í viðræðum við embættismenn borgarinnar fyrir hönd klúbbsins um stækkun vallarins enda eru um 600 manns á biðlista eftir því að komast í golfklúbbinn. Beiðni um stækkun upp í 27 holna völl auk níu holna æfingarvallarins sem fyrir er hefur verið lögð fram en engar ákvarðanir liggja fyrir. Hugmyndir eru til dæmis um að borgin fái hluta núverandi golfvallar undir íbúðabyggð og hefur fyrsta brautin meðal annars verið nefnd í því samhengi. Þannig gætu einhverjar núverandi brauta fengið nýjan stað. Dagur B. Eggertsson, formaður skipulagsmála í Reykjavík, sagði í samtali við fréttastofu Bylgjunnar og Stöðvar 2 að það væri ekkert leyndarmál að Staðahverfi, sem liggur að Korpuvelli, sé í óheppilegri stærð hvað varðar þjónustu. Heppilegt þjónustuhverfi er með 950 til 1200 íbúðir en íbúðafjöldi í Staðahverfi er þar langt undir. Nýr skóli í hverfinu, Korpuskóli, sem tekinn verður í notkun bráðlegam er of lítill miðað við núverandi stærð hverfisins og hafa foreldra lýst yfir óánægju vegna þessa. Þrír efstu árgangar skólans verða að vera í færanlegum kennslustofum þar sem ekki er pláss fyrir þá í nýju byggingunni. Verði Korpuvöllur stækkaður mun hann stækka í átt að Vesturlandsvegi og að Korpuá. Gestur Jónsson segir erfitt að segja til um verðmæti þess lands sem golfklúbburinn er að falast eftir en segir ljóst að það megi ekki byggja við Korpuá þar sem hún er friðuð.