Fjölskylduhundur stökk í hver

Berglind segir svo frá að hún hafi farið ríðandi fram hjá skurði sem hún telur að sé um hálfur metri á breidd og svipaður að dýpt en nokkuð langur og liggi meðfram gróðurhúsi. Tíkin var í fylgd með henni en svo heyrði Berglind einhver hljóð og læti svo hún staðnæmdist og kallaði á tíkina en ekki lét tíkin á sér bera. Fór hún þá að leita og kom að hundinum dauðum í sjóðandi vatni í skurðinum. Tíkin var írskur setter og bar nafnið Kasmír. Hannibal Kjartansson hitaveitustjóri segir hins vegar að atvikið hafi átt sér stað á friðlýstu hverasvæði og sé það girt af að hluta. Hundurinn hafi því stokkið í hver en ekki skurð við gróðurhús. Kjartan Helgason garðyrkjubóndi er eigandi landsins þar sem atvikið átti sér stað. Hann segir svæðið ekki afgirt eða merkt en vegur liggur í gegnum það. Hann segir að hingað til hafi engum dulist að þarna væru hættulegir hverir og því ekki þurft að merkja það sérstaklega. Berglind segir að hún hafi ekki hugsað sér aðra eftirmála en þá að komið verði í veg fyrir að svona geti endurtekið sig.