Samið um víðtækt samstarf háskóla

Runólfur Ágústsson, rektor háskólans að Bifröst, og Fang Ming Lun, starfandi rektor háskólans í Shanghai, undirrituðu nú fyrir hádegi samning um víðtækt samstarf háskólanna tveggja. Sjö nemendur að Bifröst eru við nám við Háskólann í Shanghai. Forseti Íslands og ráðamenn í Shanghai voru viðstaddir undirritunina en það þykir sérstakur virðingarvottur í Kína. Viðskiptaháskólinn að Bifröst hefur lagrt mikla áherslu á samvinnu við háskóla í Asíu og hefur nokkur fjöldi nemenda þegar dvalið í Shanghai hluta námstímans. Nú stendur til að auka samstarfið enn frekar og eru bæði fyrirhuguð nemenda- og kennaraskipti á næstunni á grunn- og meistarastigi. Friðbert Bragason, er einn sjö nemenda við Viðskipaháskólann að Bifröst sem nú eru í Shanghai. Hann segir dvölina þar hafa verið mjög áhugaverða. Það hafi verið mikið menningarsjokk að koma til borgarinnar fyrst og kynnast nýjum siðum og læra nýtt tungumál en upplifunin hafi jafnframt verið skemmtileg. Aðspurður mælir hann tvímælalaust með því að nemendur fari til Shanghai og upplifi nýja hluti og sjái .þau fjölmörgu tækifæri sem þar bjóðast. Aðspuður hvernig námið og dvölin í Shanghai komi til með að nýtast honum segir Friðbert að fyrst og fremst nýtist það fólki að komast inn í menningarheiminn, en það sé mjög erfitt. Menn geti lesið sér til um margt en þeir þurfi einnig að upplifa það. Þá hafi séð mörg viðskiptatækifæri í borginni sem hann geti nýtt sér síðar.