Smáey frá veiðum í viku

Smáey VE sem strandaði í nótt skammt frá Heimaey verður frá veiðum í viku vegna skemmda. Betur fór þó en á horfðist. Skipið, sem er rúmlega 200 brúttólesta ísfisktogari, strandaði á Faxaskeri á fjórða tímanum í nótt með tíu manna áhöfn. Skipið losnaði af sjálfsdáðum en Neyðarlínan tilkynnti lögreglunni í Vestmannaeyjum um strandið og fylgdist lögreglan með skipinu þegar það kom til hafnar. Auk þess hafði björgunarbáturinn Þór verið settur í viðbragðsstöðu en aðstoðar hans var ekki þörf. Lögreglan tók skýrslu af áhöfninni við komu til hafnar og virtist skipið við fyrstu sýn lítið sem ekkert skemmt. Nú hafa kafarar hins vegar skoðað botn skipsins og er komið í ljós að töluverðar skemmdir eru á því. Um metra löng rifa er frá stefni og aftur með skipinu. Það er Bergur-Huginn sem gerir skipið út en samkvæmt upplýsingum frá útgerðinni er verið að kanna hvert skipið verður sent til viðgerðar. Búist er við að Smáey verði frá veiðum í um vikutíma.