Aðildarumsókn ekkert einkamál

"Eðlilega þrýsta Norðurlandaráðherrarnir á okkur. Það var samkomulag um að Ísland færi í þetta ekki aðeins fyrir okkar hönd heldur einnig fyrir hönd allra Norðurlandanna. Þetta eru því líka hagsmunir annarra en okkar," segir Halldór Ásgrímsson forsætisráðherra um aðildarumsókn Íslendinga að öryggisráði Sameinuðu þjóðanna. Davíð Oddsson utanríkisráðherra kvað þrýsting norrænu utanríkisráðherranna hafa verið mikinn þegar hann hitti þá á fundi í Dammörku í byrjun mánaðarins. Halldór segir að málið varði ríkisstjórnina og ákvörðun hafi verið tekin af henni á sínum tíma í samráði við stjórnarandstöðuna um að sækjast eftir sæti í öryggisráðinu. Umsóknin gildir fyrir setu í ráðinu árin 2009 og 2010 og kemur því til inn á borð stjórnvalda eftir næstu þingkosningar. "Það er unnið að þessu máli hér á vettvangi Sameinuðu þjóðanna með þeim hætti, segir Halldór sem staddur er á allsherjarþingi Sameinuðu þjóðanna. " Að mínu mati á að stilla kostnaði í hóf og ekki að fara í dýra kosningabaráttu. Hins vegar hafa ýmsir gefið kost á sér til setu í ráðinu og tapað henni. Frændur vorir Svíar töpuðu síðast slíkri baráttu þegar þeir buðu sig fram fyrir hönd Norðurlandanna. Davíð Oddsson utanríkisráðherra hefur - eftir því sem næst veðrur komist - ekki hug á að afgreiða aðildarumsóknina áður en hann lætur af embætti í lok mánaðarins. Hann hefur opinberlega haft efasemdir um málið og 600 milljóna króna kostnað vegna væntanlegrar kosningabaráttu. Hann sagði þó í viðtali við Fréttablaðið í byrjun mánaðarins að ákvörðun yrði tekin áður en þing kemur saman í haust. Allt bendir til þess að það komi í hlut Geirs H. Haarde, verðandi utanríkisráðherra, að taka af skarið um aðildarumsóknina. Hann vildi ekki tjá sig um málið þegar Fréttablaðið leitaði eftir því í gær