Nýjar reglur um lóðaúthlutun

Bæjarstjórn Kópavogs náði í gær samkomulagi um nýjar reglur um lóðaúthlutun en síðasta úthlutun var harðlega gagnrýnd fyrir ógegnsæi og klíkuskap. Þá bárust 2300 umsóknir um lóðir við Elliðavatn en bæjarráð handvaldi þá tvö hundruð sem fengu lóðirnar. Bæði meirihluti og minnihluti í bæjarstjórn lögðu fram tillögur um breytingar á úthlutunarreglunum. Samkomulag náðist í gær um megin breytingarnar. Á Þingasvæðinu svokallaða, þar sem var úthlutað síðast, eru enn eftir nokkrir tugir lóða. Þeim verður úthlutað samkvæmt nýju reglunum sem eiga að vera gagnsærri, að minnsta kosti minna loðnar; nú er skylt að flokka umsækjendur eftir fjölskylduaðstæðum, núverandi húsnæðisaðstöðu, hvort viðkomandi hafi sótt áður um lóð og því hvort umsækjandinn hafi örugglega fjárhagslegt bolmagn til að ljúka byggingunni á tilskyldum tíma. Ef tveir eða fleiri umsækjendur eru metnir jafnir samkvæmt þessum fjórum þáttum verður dregið en það hefur ekki tíðkast í Kópavogi fram að þessu. Nú verður heldur ekki hægt að framselja byggingarétt fyrr en húsnæði er orðið tilbúið undir innréttingar og á það að hindra eða draga úr braski með lóðir. Samfylkingin vildi einnig setja inn ákvæði um að þeir gengju fyrir sem átt hefðu lögheimili í Kópavogi í eitt ár af síðustu fimm, eins og tíðkast í Reykjavík, Hafnarfirði og fleiri bæjarfélögum, en meirihlutinn féllst ekki á það.