Kveikt í bíl dansks ráðherra

Kveikt var í bíl danska innflytjendamálaráðherrans í morgun í mótmælaskyni við hert innflytjendalög stjórnvalda. Ráðherrann, Rikke Hvilshoj, sakaði ekki en hún og fjölskylda hennar voru inni í húsi sínu og bíllinn stóð í bílskúr þar við. Danska Ritsá-fréttastofan segir að áður óþekktur hópur mótmælenda hafi lýst verknaðinum á hendur sér og sagt íkveikjuna vera til þess að mótmæla kynþáttahatri danskra stjórnvalda. Hvilshoj, sem er þrjátíu og fimm ára gömul, tók við embætti ráðherra innflytjendamála í febrúar síðastliðnum.  Eldurinn barst í íbúðarhús fjölskyldunnar en var þá uppgötvaður og slökkviliðið kom á vettvang. Bíllinn er ónýtur og íbúðarhúsið nokkuð skemmt en fjölskylduna sakaði ekki. Danska ríkisstjórnin vann stórsigur í þingkosningum árið 2001 með loforðum um að herða mjög reglur um innflytjendur. Hún var svo endurkjörin í febrúar. Síðan 2001 hefur innflytjendum til Danmerkur fækkað um heil áttatíu prósent. Anders Fogh Rasmussen forsætisráðherra fordæmdi íkveikjuna, sem og leiðtogar stjórnarandstöðunnar.