Vinstri grænir ósammála

Það hriktir í stoðum R-listans. Borgarfulltrúi Vinstri-grænna telur hann einu leiðina til að hindra valdatöku Sjálfstæðisflokksins í borginni, og segist aldrei munu standa að samþykkt sem leiði það af sér. Framsókn og Samfylking munu vera sátt við þá tillögu sem lá fyrir en vinstri-grænir geta ekki sætt sig við hana - í það minnsta ekki allir. Björk Vilhelmsdóttir, borgarfulltrúi, lýsir þeirri skoðun sinni í Morgunblaðinu í dag að R-listinn sé eina leiðin fyrir vinstri-græna til að koma sjónarmiðum og stefnumálum sínum á framfæri. Án R-listans blasi við stjórnarandstaða eða samstarf við Sjálfstæðisflokkinn, sem Björk telur útilokað. Árni Þór Sigurðsson, samflokksmaður Bjarkar, er henni ósammála og sagði í samtali við fréttastofuna að það væri veruleg einföldun að láta sem þetta væru einu kostirnir. Ekkert væri því til fyrirstöðu að R-lista flokkarnir gengju til samstarfs að loknum kosningum þó að þeir biðu ekki sameiginlega fram. Dagur Snær Sævarsson, sem sat í viðræðunefndinni fyrir hönd Vinstri-grænna fagnar því að störfum hennar sé lokið í pistli á múrnum punktur is. Það þýði væntanlega endalok R-listans og Vinstri-grænir geti því loksins sýnt hvað í þeim býr í Reykjavík. Heimildir fréttastofunnar herma að klofningur sé innan flokksins, að nokkrir borgarfulltrúar séu reiðubúnir að yfirgefa flokkinn og ganga til R-lista samstarfs með Framsókn og Samfylkingu. Björk vísar tali um klofning á bug. Björk telur mikilvægast að félagshyggjuöfl verð áfram við völd í borginni og haldi núverandi stefnu áfram. Og hún segir að ef ekki verði af samstarfi R-lista flokkanna þá sé það ávísun á það að Sjálfstæðisflokkurinn nái völdum í borginni. Hún segist alls ekki taka þátt í slíkri ákvörðun. Hún sagði að einnig Vinstri grænir verði að taka ákvörðun á fundi á morgun. Hún segir nauðsynlegt að festast ekki í ákveðnum hugmyndum og að hægt sé að útfæra lausn þannig að allir séu sáttir. Niðurstaða hennar er ljós því hún segir að Reykvíkingar eigi það skilið að R-lista flokkarnir starfi áfram.